(Ռ.Վ. 28 դեկտեմբեր 2014) Շաբաթ 27 Դեկտեմբեր 2014-ին, սկիզբ առաւ Միլանօ
թեմի ուխտագնացութիւնը դէպի ս. Երկիր, գլխաւորութեամբ թեմի առաջնորդ` կարդինալ Սքոլայի
որ երեկոյեան, Բեթղեհէմի Սալեզեաններու կեդրոնին մէջ, գլխաւորեց Սուրբ Պատարագի արարողութիւնը։
Այս առթիւ Կարդինալը Ս. Երկրի Պահակ` հայր Փիէրպաթթիսթա Բիցապալլային յանձնեց երանելի
Պօղոս Զ-ի մէկ մասունքը։ Նշենք թէ Երանելի Պօղոս Զ երջանկայիշատակ Քահանայապետը նախ քան
Քահանայապետ ընտրուիլը եղած էր Միլանօ թեմի առաջնորդ։ Կիրակի, 28 Դեկտեմբեր 2014-ին,
Կարդինալը փոխադրուեցաւ Երուսաղէմ, ուր ժամը 11-ին, Գեթսէմանիի Պազիլիքային մէջ պատարագ
մատույց մինչ երեկոյեան ժամը 6-ին, իր թեմի ուխտաւորներուն հետ, հանդիպում կ’ունենայ
Երուսաղէմի լատիններու պատրիարք` գերերջանիկ Ֆուատ Թուալին հետ, որուն կը նուիրէ երանելի
Պօղոս Զ.ի այլ մասունք մը։ Երկուշաբթի` 29 դեկտեմբերին, առաւօտեան ժամը 6.30-ին
Միլանոյի առաջնորդը պատարագ կը մատուցէ ս. Թաղման տաճարին մէջ ու ապա վերադարձ կը կատարէ
Միլանօ մինչ թեմին ուխտաւորները իրենց ուխտագնացութիւնը կը շարունակեն մինչեւ 3 յունուար
2015։ Յայտնենք որ Միլանօ թեմը այս
ուխտագնացութիւնը կազմակերպած է վերակոչելու երանելի Պօղոս Զ-ի Սուրբ Երկիր կատարած
առաքելական ճամբորդութեան 50-րդ տարեդարձը։ Ուխտագնացութեան կը մասնակցին 350 հաւատացեալներ։